Dokumenta Zyrtare

Reforma e fiskalizimit synon të ulë nivelin e informalitetit dhe evazionit fiskal në ekonominë shqiptare. Kjo reformë bazohet në rritjen e transparencës së transaksioneve tregtare dhe verifikimin e tyre në kohë reale.

Bazë e kësaj reforme është Ligji nr. 87/2019, datë 18.12.2019, “Për faturën dhe sistemin e monitorimit të qarkullimit”, botuar në Fletoren Zyrtare Nr. 3, më 20.01.2020. Ky ligj, i njohur si “Ligji i fiskalizimit”, është themeli i reformës.

Për zbatimin e plotë të reformës së fiskalizimit, ligji nr. 87/2019 është ndryshuar me Ligji nr. 108/2020, datë 29.07.2020. Sipas këtij ndryshimi, afatet për zbatimin e sistemit të ri janë:

• Për transaksionet pa para në dorë, ndërmjet tatimpaguesve dhe organeve publike, efektet fillojnë më 1 janar 2021.
• Për transaksionet pa para në dorë, ndërmjet tatimpaguesve, efektet fillojnë më 1 korrik 2021.
• Për transaksionet me para në dorë nga tatimpaguesit, pavarësisht përgjegjësisë tatimore apo qarkullimit vjetor, efektet fillojnë më 1 shtator 2021.

VINI RE!

Edhe pse në tekstin e ligjit përdoren fjalët “efektet... fillojnë”, kjo nuk do të thotë që tatimpaguesit duhet të fillojnë të pajisen me zgjidhje të certifikuar për fiskalizimin nga këto data. Këto janë afate përfundimtare: pra, tatimpaguesit duhet të zbatojnë plotësisht ligjin jo më vonë se këto data. Për shembull, nga data 01.01.2021, për transaksionet pa para në dorë ndërmjet tatimpaguesve dhe organeve publike, nuk mund të lëshohen më fatura tatimore të zakonshme. Nga kjo datë, kundrejt administratës publike, mund të lëshohen vetëm fatura elektronike, një element qendror i ligjit të fiskalizimit.

Udhëzimi nr. 16, datë 03.04.2020, sqaron dispozitat konkrete të ligjit nr. 87/2019, përfshirë rregullimin e faturave dhe sistemin e monitorimit.

Udhëzimi nr. 20, datë 01.06.2020, detajon se si do të funksionojnë dhe kur do të përdoren faturat elektronike dhe ato shoqëruese.

Për ata që duan të kuptojnë më shumë rreth lëshimit të faturave të thjeshta, udhëzimi nr. 220, datë 12.03.2020, është një burim i rëndësishëm informacioni.

Për pyetje, dyshime apo nevoja të tjera lidhur me procesin e fiskalizimit, ju këshillojmë t'i drejtoheni Administratës Tatimore në adresën [email protected].